Hugsað til Þ. B.
Á landsenda sé ég fólk
í fangbrögðum við skapanornir
og við dynhamra, flugabjörg
og flækjur veðra
fiskaslóðir, matkletta
moldir, einstigu.
Langt í norður frá hendi minni:
hræddum garðfugli.
Guðstrúarfólk í rekavíkum.
Og glæringar drauga!
Söguslóð sem er margbrugðin
sauðgróðri, vorskini, lífgrösum.
Söguslóð sem er margbrugðin
sjávarnið, dökkva, snæbirtu.
Heim innan heimsins. Lífs-stríð
undir hengjum dauðans.
Langt í norður frá hendi minni:
hræddum garðfugli |